(இடைத்) தேர்தல் ஆருடம் 2017 – ஆர்.கே.நகர்

By Sivakumar Mahalingam On 16 December 2017 In அரசியல்

பரபரப்பான ஆர்.கே.நகர் தேர்தல் மீண்டும் நிறுத்தப்படுமோ என்ற சந்தேகத்துடன் அனைத்து வேட்பாளர்களும் பிரச்சாரம் செய்வதாக சொல்கிறார்கள். இந்த பரபரப்பில் பங்கு கொள்ளும் வகையில் (?), தேர்தல் நடந்தால் யார் வெல்லக்கூடும் என்று ஆருடம் சொல்லலாமே என்ற எண்ணத்தில் பதிவிடுகிறேன்.

எச்சரிக்கை – இந்த ஆருடம் களத்தில் ஆய்வு செய்து சொல்லப்படுவதல்ல, கடந்த காலத்தில் நடந்த ஆர்.கே.நகர் தேர்தல்களின் புள்ளிவிவரங்கள் மற்றும் தற்போதைய சில நிகழ்வுகள் மீதான மேம்போக்கான கருத்துகளை கொண்டு சொல்லப்படுவது. இந்த ஆருடத்திற்கு எந்த வாரண்ட்டியோ/கியாரண்டியோ கிடையாது.

கடந்த காலத்தில் நடந்த ஆர்.கே.நகர் தேர்தல்களின் புள்ளிவிவரங்கள் –

இந்த புள்ளிவிவரங்கள் சொல்லும் சில சேதிகள் –

1989 தேர்தலில் பிரிந்திருந்த அதிமுக அணிகள் பெற்ற வாக்குகள் – ஜெ அணி 25%, ஜா அணி 17% (ஆக மொத்தம் – 42%). அதிமுக வாக்குகளிடையே பிரித்தால் 60% அதிமுக வோட்டுகள் ஜெ அணிக்கும், 40% வோட்டுகள் ஜா அணிக்கும் கிடைத்தன.
2001 முதல் நடந்த தேர்தல்களில் அதிமுக குறைந்தபட்சம் 50% வாக்குகளேனும் பெற்றிருக்கிறது; 2006 ஆட்சி மாற்ற தேர்தலில் மட்டும்தான் 50%, மற்றபடி 55% க்கு மேல்தான். ஆக, இந்த தொகுதியின் அதிமுக அபிமானம் அவ்வளவு எளிதாக கரையக்கூடியதல்ல.
1996 தேர்தல் தவிர “அதிமுக எதிர்ப்பு” ஓட்டுக்களை திமுக பெரிதாக அறுவடை செய்யவில்லை. உதாரணமாக, 2006ல் அதிமுக 8% வோட்டுகளை இழந்திருந்தாலும், திமுக அணி வேட்பாளர் 3% வோட்டுகள் மட்டுமே அதிகம் பெற்றிருக்கிறார்.
2011 பொது தேர்தலை ஒப்பிடும்போது 2016ல் அதிமுக 3% வாக்குகளும், திமுக 4% வாக்குகளும் இழந்திருக்கின்றன
இத்தனை தேர்தல்களிலும் அதிகபட்சமாக வாக்களிப்பு நிகழ்ந்தது 2015 இடைதேர்தலில்தான் – அதுவும் 74% மட்டுமே. ஆக இந்த முறை பெரும் மாற்றம் இருக்கும் என்று தோன்றவில்லை (அதிகபட்சம் 80% இருக்கலாம்).

சரி, உன் ஆருடம் என்ன என்று கேட்கிறீர்களா?

2016 தேர்தலில் மக்கள் நல கூட்டணியில் இருந்த விடுதலை சிறுத்தைகள் வேட்பாளர் 2% வாக்குகளும், பாமக வேட்பாளர் 2% வாக்குகளும் பெற்றிருந்தனர். அவை இப்போது முறையே திமுகவுக்கும், அதிமுகவுக்கும் போயிவிடும் (அதெப்படி பாமக வோட்டுகள் அதிமுகவிற்கு போகும் என்றால் – விடுதலை சிறுத்தைகள் ஆதரிக்கும் அணிக்கு பாமக சார்ந்தவர்கள் ஆதரிக்கமாட்டார்கள் என்ற வழக்கமான லாஜிக்தான்)
இப்போது இருக்கக்கூடிய “அதிமுக எதிர்ப்பு” மனநிலையை திமுக பெரும் அறுவடை செய்துவிடாது என்றே தோன்றுகிறது. அதிகபட்சம், 2016ல் இழந்த 4% வாக்குகளை மீட்கக்கூடும்.

ஆக, மேற்சொன்ன (1), (2) வைத்து பார்த்தால் திமுக 39% (33 + 2 + 4) வாக்குகள் பெறும். அதிமுக (இரண்டு அணிகளும் சேர்த்து) 54% (56 +2 – 4) வாக்குகள் பெறும். 1989ல் அதிமுக வாக்காளர்கள் 60% ஜெ அணிக்கும் 40% ஜா அணிக்கும் வாக்களித்துள்ளனர். அதுபோன்று இல்லாமல் இப்போது 75% ஒரு அணிக்கும், 25% மற்றொரு அணிக்கும் வாக்களித்தால், 75% (அதாவது, மொத்த வாக்குகளில் 40%) தக்க வைக்கும் வேட்பாளர் எம்.எல்.ஏ ஆவார். உதாரணமாக, கீழ்கண்ட ஊக அட்டவணையை பார்ப்போம்.

பொதுவாக நிலவும் ஆளுங்கட்சி அதிருப்தி, பிரச்சார உத்திகள் மற்றும் தொலைக்காட்சி பேட்டிகளை வைத்து பார்க்கும் போது 75% அதிமுக வாக்காளர்களின் வாக்குகளை தினகரன் பெற்றுவிடுவார் என்று தோன்றுகிறது. அந்த வகையில், என் ஆருடம் இதுதான் – முதலிடம்: தினகரன், இரண்டாமிடம்: மருதுகணேஷ். தேர்தல் நடந்தால், வரும் 24ந் தேதி இந்த ஆருடம் (மேற்சொன்ன புள்ளிவிவரங்களோடு) பலிக்கிறதா என்று பொறுத்திருந்து பார்க்கலாம்.